Vieiros

Estes últimos 224 casos aparecen nos arquivos baixo o epígrafe de "descoñecidos", e son os únicos sen nomes e apelidos neste censo, que esta sexta feira foi entregado ao xuíz da Audiencia Nacional española, Baltasar Garzón, polo Goberno. Os outros 4.396 nomes de vítimas do franquismo están completos, e aparecen a carón dos lugares onde se atopan soterrados os seus posuidores, coa descrición das causas das súas mortes, descritas, entre 1936 e 1939, polos seus asasinos.

Ademais do censo, o xuíz Garzón recibiu un mapa que recolle 305 "lugares de represión", que foron escenario de fusilamentos e paseos ou soterramentos. Tamén hai cárceres e predios nos que se practicou a tortura e 26 foxas e 11 puntos da costa nos que se deitaban os cadáveres.

Antes que fose solicitada
O Goberno remitiulle ao xuíz toda esta documentación, que esta sexta feira estaba xa en Madrid, a pesar de que Baltasar Garzón aínda non llela tiña solicitado. O maxistrado ditara, o pasado 1 de setembro unha providencia na que reclamaba a institucións como o Valle dos Caídos, a Conferencia Episcopal Española (CEE), o Centro Documental de Memoria Histórica ou os alcaldes de Madrid, Sevilla, Granada e Córdoba que elaborasen diversas listaxes e aportasen datos sobre os desaparecidos durante a Guerra Civil.

O xuíz adoptou esta decisión como paso previo a decidir se é competente ou non para investigar as denuncias que varias asociacións da memoria histórica presentaron o 18 de xullo de 2007 na Audiencia Nacional. Estes colectivos solicitaran a persecución penal dos autores das desaparicións, asasinatos, torturas e exilios forzosos que se cometeron a partir de 1936.

Entre as denuncias das asociacións atópanse tamén as formuladas pola Asociación pola Memoria Histórica do 36, de Ponteareas, o que fai pensar que se a investigación avanza, os datos aportados pola Xunta serán útiles para o proceso que se poida desenvolver na Audiencia Nacional española.

Un intenso traballo de investigación
A conselleira de Cultura, Ánxela Bugallo aseguraba, o pasado día 3 de setembro, que os datados remitidos a Garzón son froito dun traballo de investigación "rigoroso" no que se implicaron as tres universidades galegas e que xuntou datos de 14.600 persoas, das que 3.588 faleceron durante a contenda.

O censo tirouse do traballo 'As vítimas, os nomes, as voces, os lugares' que no seu momento impulsou a Consellaría de Cultura.